വർണ്ണവെറി; യു എസിൽ വീട് മാറി ഡോര്‍ ബെല്‍ അടിച്ച പതിനാറുകാരന് തലയ്ക്ക് വെടിയേറ്റു

സുഹൃത്തിന്റെ വീട്ടില്‍ പോയ സഹോദരങ്ങളെ കൂട്ടിക്കൊണ്ടുവരാന്‍ പോയ റാല്‍ഫ് യാള്‍ 16 കാരന് വീട് മാറിപ്പോയതിന് പിന്നാലെ തലയ്ക്ക് വെടിയേറ്റു. കാന്‍സാസിലാണ് സംഭവം. കറുത്ത വര്‍ഗക്കാരനായ പതിനാറുകാരനാണ് തലയ്ക്ക് വെടിയേറ്റ് ഗുരുതരാവസ്ഥയിലായത്.   

വ്യാഴാഴ്ച വൈകുന്നേരമാണ് വെടി വയ്പുണ്ടായത്. ഇരട്ട സഹോദരന്മാരെ വീട്ടിലേക്ക് തിരികെ കൊണ്ടുവരാന്‌ പോയ റാല്‍ഫിന് വീട് മാറിപ്പോയിരുന്നു. മേലത്തെ നിലയിലെ ഡോർ ബെല്ലിന് പകരം താഴെ നിലയിലെ  ബെല്ലാണ് അടിച്ചതെന്നാണ് സൂചന. വാതില്‍ തുറന്ന ഉടന്‍ റാല്‍ഫിന് വെടിയേല്‍ക്കുകയായിരുന്നു. വീട്ടിലേക്ക് തിരികെ ഓടാനുള്ള ശ്രമിക്കുന്ന നിലയിലാണ് അവശനായ റാല്‍ഫിനെ കണ്ടെത്തിയത്. സംഭവത്തിൽ എൺപത്തിയഞ്ചുകാരനായ വെളുത്ത വർഗ്ഗക്കാരനെ പോലീസ് അറസ്റ്റ് ചെയ്തു.

തലയില്‍ വെടിയേറ്റ കുട്ടിയുടെ ശരീരത്തിലേക്കും വെടിയേറ്റതിനാല്‍ അബദ്ധത്തിലുണ്ടായതല്ല വെടിവയ്പെന്ന നിഗമനത്തിലാണ് പൊലീസുള്ളത്. വെടിവയ്പില്‍ രൂക്ഷമായ പ്രതിഷേധമാണ് ഉയരുന്നത്. ഹോളിവുഡ് താരങ്ങള്‍ അടക്കം റാല്‍ഫിന് നേരെയുണ്ടായ വെടിവയ്പിനെ അപലപിച്ച് പ്രതികരിച്ചിട്ടുണ്ട്.